محامي

لما يكون عندك قضيه قتل ، المتهم فيها معترف وفيها خمسين شاهد كلهم اجمعوا ان المتهم قتل المجنى عليه الساعه 12 ظهراً وانتقل الطبيب الشرعي لمعاينه الجثه وتشريحها فى تمام الساعه 4 عصراً ، فأثبت فى تقرير الصفه التشريحيه ( انه وجد الجثه فى الثلاجه ووجدها فى طور التعفن الرمى ).

يبقى الجمله دى هتنسف اعتراف المتهم بالقتل وهتنسف كذلك اقوال الشهود .... ازاى ؟!

 - جملة انه وجد الجثه فى التلاجه ليها دلاله ان الجثه منذ دخولها الى التلاجه بتظل محتفظه بالتغيرات الرميه ، لان مهمة التلاجه انها تحافظ على حالة الجثه التى كانت عليها منذ دخولها. 

- جملة انه وجد الجثه فى حالة التعفن الرمى ، فدى معناها ان جريمه القتل لم تتم بأي حال من الاحوال قبل 18 ساعه ، يعنى تم ارتكابها بالامس او اول امس ( حسب درجه التعفن ) وده بينسف اعتراف المتهم انه قتل المجنى عليه الساعه 12 ظهرا اي قبل اربع ساعات من تشريحها !!

فى حالة تعارض اعتراف المتهم مع الدليل الفنى ( تقرير الطبيب الشرعي ) المحكمة لن تأخذ بإعترافات المتهم ، لأن الدليل الفنى اقوي من اقوال الشهود بل أقوي من اعتراف المتهم ذاته.

............. فى احدي القضايا طلب المحامى من المحكمه استدعاء الطبيب الشرعي لمناقشته فى هذه الجزئيه ( التغيرات الرميه ) ، فالقاضي قاله : يا استاذ ارجع لأي مرجع فى الطب الشرعي وقدمه للمحكمه.

وبصرف النظر عن رد المحكمه ومصادرتها على الدفاع ، لكن المسأله دى بتخلينا نرجع لكتب الطب الشرعي عشان نشوف المراحل اللى بتمر بيها الجثه عقب الوفاه ، ويمكننا اختصارها كما يلى :-

✳ مرحلة بروده الجسم :- بيبدأ الجسم يبرد بالتدريج حتى تتساوى درجه حراره الاحشاء الداخليه للجثه مع درجه حراره الجو المحيط بها ، وبتفقد الجثه – فى  المتوسط – درجه مئويه واحده من حرارتها فى الساعه ، وذلك بعد مضي تلاث ساعات من الوفاه ( اي بعد حدوث فرق واضح بين درجه حراره الجلد والاحشاء الداخليه ) لذلك تقاس درجه حراره الجثه ثم تخصم من 37 ثم يضاف لها 3 فتعطى زمن الوفاه .... يعنى لو كانت حراره الجثه 25 فإن زمن الوفاه = 37- 25 + 3 = 15 ساعه ، يعنى الوفاه حصلت من 15 ساعه سابقه على معاينه الطبيب الشرعي للجثه.

✳ مرحلة الرسوب الدموى :- وفى المرحله دى الدم بيترسب بالاجزاء المنخفضه من الجثه بفعل الجاذبيه الارضيه  ، وبيبدأ من حوالى ساعه الى ساعتين من حدوث الوفاه ، وبيكون على هيئه بقع تكبر تدريجيا ويكتمل انتشارها بعد نحو 6 – 8 ساعات.

يعنى لو ظل الرسوب الدموى ثابت ولم يتغير فمعنى كدا انه قد مر اكثر من 8 ساعات على الوفاه.

✳ مرحلة التيبس الرمى :- وبيقصد بيها تيبس الجسم وتصلب العضلات ، وبيبدأ بالعضلات الصغيره والفكين ( بحيث يصعب اغلاق الجفون أو اغلاق الفكين ) ويكتمل حدوثه فى بقيه الجسم  فى خلال  8 – 12 ساعه ، و بعد 12 ساعه اخري يبدأ التيبس فى الزوال تدريجياً بنفس الترتيب الذي ظهر به ، بحيث يصبح الجسم مرتخيا تماما بعد 36 ساعه من الوفاه.

ولو فى الصيف بيحدث التيبس ويزول فى نصف المده المذكوره لارتفاع درجات الحراره ، ونقدر نفصّل المرحله دى كما يلى :-

- لو كان الجسم دافئ ومرتخي والرسوب الدموى على هيئه بقع فى بدايه التكون فزمن الوفاه يكون حوالى اقل من 3 ساعات

- لو كان الجسم دافئ ومتيبس والرسوب غير ثابت فزمن الوفاه يكون حوالى 3 – 8 ساعات

- لو كان الجسم بارد ومتيبس والرسوب ثابت فزمن الوفاه يكون حوالى 8 – 36 ساعه

- لو كان الجسم بارد ومرتخي والرسوب ثابت يبقى زمن الوفاه اكتر من 36 ساعه

✳ مرحلة التعفن الرمى :- وفى المرحله دى بتبدأ الجثه فى الانتفاخ ، وتتكون فقاقيع تحت الجلد وتخرج سوائل الرئه بشكل مواد رغويه من الفم والانف ، ثم تتحلل الجثه تدريجيا وتتلاشي الانسجه الرخوه وتتغذي عليها الديدان الى ان تنتهى فى صوره عظام متصله ببعضها البعض عند المفاصل.

ونقدر نفصّلها الى المراحل الاتيه :-

- اخضرار يمين اسفل جدار البطن وده بيكون حوالى بعد 18 – 24 ساعه صيفا وبعد 36 ساعه شتاءا

- تشجر الاوعيه الدمويه على سطح الجلد وده بيكون حوالى بعد 36 ساعه صيفا و 48 ساعه شتاءا 

-  اخضرار كل جدار البطن والصدر وظهور فقاقيع غازيه وبروز اللسان وده بيكون حوالى بعد  يومين صيفا وتلاثه ايام شتاءا

- انتفاخ الوجه والبطن ووضع الذباب للبيض بالفتحات الطبيعيه للجثه وده بيكون حوالى بعد 3 ايام صيفا ومن 5 – 6 ايام شتاءا

- تضيع معالم الوجه تماما حوالى بعد 5 ايام فى الصيف و 10 ايام شتاءا 

- ينفجر جدار البطن وتظهر الاحشاء البطنيه بعد حوالى 10 ايام فى الصيف و 20 يوم شتاءا

- تتحلل كل الاربطه والغضاريف وتبقى العظام متصله بالاربطه فقط بعد حوالى 3 شهور فى الصيف و 6 شهور شتاءا 

- تتحلل الاربطه والغضاريف وتتفكك العظام من بعضها بعد حوالى 6 شهور فى الصيف وحوالى 12 شهر شتاءا 

 علما ان معدل تعفن الجثه وهى فى الماء ( فى حاله الغرق مثلا ) بيكون ابطأ من معدل تعفنها وهى فى الهواء ، وفيه قاعده اسمها قاعده كاسبر بتقول ( مظاهر التعفن على الجثه الموجوده فى الهواء الطلق خلال اسبوع هى نفسها على الجثه الموجوده فى الماء خلال اسبوعين وعلى الجثه المدفونه فى الارض خلال ثمان اسابيع ).

دى اهم مراحل بتمر بيها الجثه .... ولأنها كلها معلومات طبيه فلازم اذكر المراجع :-

• معاينه مسرح الجريمه للدكتور هشام عبد الحميد ( مدير اداره الطب الشرعي )

• مبادئ علم الطب الشرعي والسموم لرجال الامن والقانون للدكتوره رجاء محمد عبد المعبود

• الطب الشرعي مبادئ وحقائق للدكتور حسين على شحرور

.........

البوست ده بخصوص زمن الوفاه ، اما مكان الوفاه فغالبا يمكن ايضا تحديده من خلال آثار الدماء حول الجثه او الرسوب الدموى ، فبتقدر تعرف هل الجثه تم قتلها فى هذا المكان ( وفقا لاقوال الشهود مثلا ) ام قُتلت في مكان اخر وتم نقلها بعد قتلها الى المكان الذي تواجدت فيه.

وهنفرد لها بوست مستقل بإذن الله.